Mamamayan ng Las Piñas City masayang bumati sa kaarawan ni PBBM

Kabilang ang Las Piñas City sa 94 na mga lungsod at bayan sa iba’t ibang panig ng bansa ang masayang bumati sa kaarawan ni Pangulong Ferdinand “Bongbong” Marcos Jr. ngayong Lunes ng umaga.

Bilang regalo ng Pangulong Marcos sa mga Pilipino, sabay-sabay na inilunsad ang programang “Handog ng Pangulo Serbisyong Sapat Para Sa Lahat” kung saan mahigit 2,000 na Las Piñeros ang masuwerteng benepisyaryo, na ginanap sa Aguilar Sports Complex sa Barangay Pilar sa lungsod.

Pinangunahan nina Mayor April Aguilar, Vice Mayor Mel Aguilar at Congressman Mark Anthony Santos kasama si Metropolitan Manila Development Authority (MMDA) Chairman, Atty. Don Artes at ilang opisyal ng ahensiya, ang paglulunsad ng naturang programa.

Iba’t ibang serbisyo ang handog ng Presidente gaya ng PSA services, Philhealth services, libreng medical consultation at gamot, Kadiwa ng Pangulo at iba pa na kasama sa “Yakap na Handog ng Pangulo” para sa lahat. Bukod pa rito ang tulong pinansiyal na matatanggap ng mga benepisyaryo mula sa tanggapan ng Department of Social Welfare and Development (DSWD) mayroon pang libreng pagkain handog ng Pangulo at ng MMDA para sa Las Pin̈eros. Ito ay bahagi ng paggunita sa selebrasyon ng kaarawan ng Pangulo nitong Setyembre 13. Sentro naman ng programa sa isinagawang Salo-Salo sa Palasyo.

Ito ay pagpapakita ng tunay na malasakit at suporta ng pambansang pamahalaan upang direktang ihatid ang mahahalagang tulong para sa mamamayan.

Nagpaabot ng taos-pusong pasasalamat si Mayor Aguilar sa ating butihing Pangulong Marcos sa patuloy na pagbibigay ng napakahalagang tulong at suporta para sa Las Piñeros. ( Bhelle Gamboa)