Babaeng call center agent timbog sa P630K na halaga ng “kush” sa Taguig

Isang babaeng call center agent na natukoy na bagong drug personality ang naaresto ng mga operatiba ng Southern Police District (SPD) matapos umanong bumalik para kunin ang kahon na naglalaman ng 420 na gramo ng hinihinalang marijuana (Kush) na nagkakahalaga ng ₱630,000, sa Barangay Ususan, Taguig City, ngayong Lunes ng madaling araw.

Kinilala ang suspek na si alyas April, 24-anyos, at residente sa Barangay North Signal, Taguig City. Siya ay dinakip sa paglabag sa Section 11, Article II of Republic Act No. 9165, o mas kilala sa tawag na Comprehensive Dangerous Drugs Act of 2002.

Natukoy ang suspek na siyang nag-iwan ng kahon na naglalaman ng ilegal na droga sa pangasiwaang erya.

Ayon sa inisyal na imbestigasyon, dakong alas-11:30 ng gabi nitong PM Setyembre 6, nagsasagawa ng routinr patril sa establisiyimento ang isang K9 handler at K9 partner nito nang may senyales ng posibleng presensiya ng ilegal na droga sa naturang lugar.

Mabilis na rumesponde ang mga tauhan ng Sub-Station 4, Taguig City Police Station kasama ang District Mobile Force Battalion personnel,dito nadiskubre ang kahon na naglaman ng pinaniniwalaang ng marijuana Kush.

Kaagad nakipag-ugnayan ang mga rumespondeng pulis sa CCTV operator ng establisyimento upang suriin ang footage at tukuyin ang taong nag-iwan ng package.

Bandang ala-1:15 ng madaling araw bumalik si alyas April sa concierge area at tinanong ang kahon na kanyang naiwan, dito nakumpirma sa CCTV footage na parehong tao ang nag-iwan ng package dahilan upang arestuhin siya ng mga pulis.

Narekober ng otoridad mula sa suspek ang umano’y kush kasama ang apat na kahon ng Kraft Mac & Cheese at isang box container.

Agad dinala si alyas April sa Station Drug Enforcement Unit (SDEU) ng Taguig CPS para sa pagsasampa ng kaso laban sa suspek.

Patuloy ang SPD sa ilalim ng liderato ni District Director BGen Rodel A. Pastor, sa pagpapalakas ng kanyang kampanya kontra ilegal na droga sa pamamagitan ng maigting na police operations at malapit na koordinasyon sa mga establisyimento at community stakeholders upang pigilan ang droga na umabot sa mga komunidad. (Bhelle Gamboa)