Taguig LGU naglabas ng pahayag ukol sa 911 program ng national government at respondeng naganap sa Maharlika Village

Nakikiramay ang Lungsod Taguig sa pamilya ng pasyenteng pumanaw kaugnay ng 911 response sa Maharlika Village. Nakikiisa ang lungsod sa kanilang pagdadalamhati sa mahirap na panahong ito.

Nakakatanggap ang I Love Taguig Facebook page ng mga tags at tanong ukol sa 911 response sa Maharlika Village. Dahil dito, minarapat ng Lungsod Taguig na maglabas ng paunang pahayag upang mailahad ang impormasyong nakalap batay sa records ng mga kinauukulang tanggapan.

Dakong alas-12:17 ng hapon noong Agosto 15 naakatanggap ang Taguig Command Center ng tawag mula sa Unified 911 para sa ambulance assistance sa Maharlika Village dahil sa iniulat na posibleng heart attack.

Ang Unified 911 ay isang national emergency hotline sa ilalim ng DILG at hiwalay sa direktang emergency hotlines ng Lungsod Taguig.

Ang address na ibinigay ng 911 sa Taguig Command Center ay lot at block number lamang — walang street address o landmark man lang.

Paulit-ulit na sinubukan ng Taguig Command Center na makuha mula sa 911 ang kumpletong address ng pasyente, subalit hindi naibigay ang mga kinakailangang detalye para matukoy ang eksaktong lokasyon ng pasyente.

Sinubukan din ng Taguig Command Center na tawagan ang contact number ng caller na ibinigay ng 911 subalit hindi nasagot ang mga tawag nito.

Nakipag-ugnayan ang Taguig Command Center sa Barangay Maharlika at Barangay Upper Bicutan para sa agarang tulong.

Samantala, sa pagnanais ng agarang tulong, nagtungo ang ilang kamag anak ng pasyente sa Barangay Hall ng Maharlika. Sa kanilang pakiusap ay agad ipinadala ng Barangay ang kanilang Patient Transport Vehicle (PTV) at dagling dinala ang pasyente sa Taguig-Pateros District Hospital, kung saan siya dumating ng 12:43 p.m. Agad siyang binigyan ng medical intervention at resuscitative measures, ngunit idineklarang pumanaw nang 1:24 ng hapon.

Pumunta ang ambulance ang Upper Bicutan sa Maharlika Barangay Hall upang magtanong ukol sa pasyente dahil wala pa rin silang makuhang kumpletong impormasyon. Doon nila nalaman na dinala na ng Patient Transport Vehicle ng Maharlika ang pasyente sa Taguig Pateros District Hospital.

Handa ang mga kinauukulang tanggapan ng Taguig na makipagtulungan at magbigay ng kinakailangang impormasyon sa anumang opisyal na imbestigasyon ukol sa usaping ito.

Para sa agarang tulong sa panahon ng emergency, hinihikayat ang mga Taguigeño na i-save ang mga direktang emergency hotline ng Lungsod Taguig. Makikita ang kumpletong listahan ng hotline numbers dito: https://bit.ly/TaguigEmergencyHotlines

Sa ngayon, hinihiling ng I Love Taguig na mabigyan ang pamilya ng pagkakataong magluksa sa pagpanaw ng kanilang mahal sa buhay. (Bhelle Gamboa)