26 na lugar sa BARMM nakasailalim sa RED Category – Comelec
Aabot sa 26 na mga lugar sa Bangsamoro Region in Muslim Mindanao ang nakasailalim sa RED Category kaugnay ng idaraos na BARMM Parliamentary Elections.
Sa 26 na lugar na nakasailalim sa RED Category, 21 ang mula sa Lanao del Sur, 2 sa Maguindanao del Sur at tig-iisa sa Basilan, Maguindanao del Norte, Special Geographic Areas.
Sa pagtukoy sa mga areas of concern, gumagamit ang Comelec ng color coding category na green, yellow, orange at red.
Sa ilalim ng Category GREEN ang lugar ay walang anumang banta o security concerns at itinuturing na peaceful at orderly.
Sa Category YELLOW naman, ang mga lugar ay mayroong hinihinalang election-related incident sa nakalipas na dalawang eleksyon, politically motivated ERI sa kasalukuyang election period, at may umiiral na intense partisan political rivalry o kaya naman ay dati nang naisailalim sa Comelec Control.
Sa Category ORANGE, ang mga lugar ay nakaranas ng dalawang insidente na tinukoy sa ilalim ng YELLOW category.
At sa Category RED, ang mga lugar ay mayroong isa o higit pang factors na makikita sa ilalim ng Category YELLOW at Category ORANGE, at may serious armed threats. (DDC)
