VP Sara accountable sa maling paggamit ng confidential fund ng DepEd
Puwedeng ituring na accountable si Vice President at dating Education Secretary Sara Duterte kaugnay ng maling paggamit ng confidential funds.
Ayon sa testigo mula sa Commission on Audit na si Roderick Wamil, sinabi nitong naglabas siya ng Audit Observation Memorandum sa paggamit ng DepEd sa confidential funds nito sa pagitan ng February 20 hanggang March 30, 2023 at April 20 hanggang June 29, 2023.
Tinukoy ni Wamil ang umano ay iregularidad sa paggamit ng DepEd sa confidential funds nito matapos na hindi makasunod sa itinatakda ng Joint Circular Number 2015 – 01 ng COA.
Sa nasabing Joint Circular itinatakda ang guidelines sa paggamit, liquidation, at pag-report ng confidential funds.
Sinabi ni Wamil na nabigo kasi ang DepEd na magsumite ng supporting documents para sa liquidation ng ginamit nitong 112.5 million pesos na halaga ng confidential funds noong 2023. (DDC)
