Bayanihan sa Barangay ng MMDA dinala sa Alabang, Muntinlupa City
Mas pinalakas ng Metropolitan Manila Development Authority (MMDA) ang kampanya para sa mas malinis, ligtas, at disiplinadong komunidad sa pamamagitan ng “Bayanihan sa Barangay” na isinagawa sa Barangay Alabang, Muntinlupa City.
Pinangunahan ni MMDA Deputy Chairman Usec. Frisco San Juan, Jr. ang programa sa Alabang Elementary School ngayong Martes, Hulyo 28, at binigyang-diin niya ang mahalagang papel ng mga magulang sa paggabay sa kanilang mga anak upang maging responsable at makiisa sa pagpapanatili ng ligtas at maayos na pamayanan.
Ayon kay San Juan, ang “Bayanihan sa Barangay” ay hindi lamang programa ng MMDA kundi isang inisyatiba para sa kapakinabangan ng bawat residente at komunidad.
Nagpasalamat naman si Muntinlupa City Mayor Ruffy Biazon sa MMDA sa pagsasagawa ng programa. Aniya, ang pagpapanatili ng kalinisan at kaayusan ay hindi lamang tungkulin ng pamahalaan kundi responsibilidad ng bawat mamamayan.
Dumalo rin sa programa sina MMDA Assistant General Manager for Operations Asec. David Angelo Vargas, Health, Public Safety and Environmental Protection Office (HPSEPO) Dir. Francisco Martinez, at Solid Waste Management Office (SWMO) Dir. Remedios Asprer.
Kabilang sa mga isinagawang aktibidad ang:
– Trimming ng mga puno;
– Declogging ng mga drainage;
– Clearing operations;
– Pagpipintura ng pedestrian crossings; at
– Paglalagay ng mga road signages.
Nagkaroon din ng mga information sessions tungkol sa anti-smoking at anti-vaping campaign, anti-littering, traffic management, solid waste management, at disaster preparedness upang mapalawak ang kamalayan ng mga residente.
Bilang bahagi ng adbokasiya sa tamang pamamahala ng basura, nakatanggap din ng grocery items ang ilang residente kapalit ng kanilang mga naipong recyclable materials sa pamamagitan ng MMDA Mobile Materials Recovery Facility (MMRF). (Bhelle Gamboa)
