LTFRB tatanggap muli ng aplikasyon para sa prangkisa ng Motorcycle Taxi

Simula sa August 5 tatanggap na muli ang LTFRB ng aplikasyon para sa mga motorcycle taxi rider at letter of intent para sa akreditasyon ng Motorcycle Taxi Platform Provider.

Ayon kay LTFRB Chairman Atty. Vigor Mendoza II, sa nasabing petsa maaari nang maghain ng aplikasyon para pag-iisyu ng Provisional Authority to Operate o prangkisa para sa Motorcycle Taxi.

Tiniyak naman ni Mendoza na ibabase pa din ang pag-iisyu ng prangkisa sa rider cap na inilaan ng Motorcycle Taxi Technical Working Group sa bawat Motorcycle Taxi Platform Provider.

Wala ding papayagang bagong players para sa aplikasyon at ang tanging tatanggapin ay ang mga nauna nang binigyan ng go signal para makapag-operate.

Layunin nito ayon kay Vigor na matiyak na mayroong reliable at komportableng transport system ang mga pasahero sa araw-araw nilang pagco-commute. (DDC)