Task Force binuo ng BOC para mapabilis ang Cargo Flow

Bumuo ang Bureau of Customs ng isang Technical Working Group o Task Force para mapabilis ang paggalaw ng mga kargamento sa mga pangunahing pantalan at paliparan sa bansa.

Ang hakbang ay kasunod ng inspeksyong isinagawa ni Customs Commissioner Ariel Nepomuceno sa isang air cargo warehouse kung saan sinuri nito ang daloy ng mga kargamento upang matukoy ang mga problemang nakaaapekto sa operasyon.

Pangungunahan ang Task Force ni Deputy Commissioner Agaton Teodoro Uvero, katuwang si Assistant Commissioner Vincent Phillip Maronilla.

Makikipag-ugnayan din ang BOC sa iba’t ibang ahensya ng gobyerno at mga kinatawan ng pribadong sektor upang matugunan ang mga bottleneck sa port operations at mapabilis ang customs clearance.

Ayon kay Commissioner Nepomuceno, mahalaga ang pagtutulungan ng pamahalaan at pribadong sektor upang matiyak ang maayos na daloy ng lehitimong kalakalan habang pinananatili ang mahigpit na pagpapatupad ng customs laws.