Culiat Bridge sa QC sinuri ng DPWH matapos ang sunog noong Sabado

Ininspeksyon ng Department of Public Works and Highways ang pinsalang natamo ng Culiat Bridge II matapos ang sunog na naganap sa bahagi ng Congressional Avenue sa Quezon City noong Sabado ng gabi.

Bagaman agad naapula ang sunog ay nagdulot ito ng pinsala sa ilalim ng tulay dahil sa mataas na temperatura mula sa apoy.

Sa paunang ulat, parehong carriageway ng Culiat Bridge II ang nakaranas ng matinding init na nagdulot ng pag-umbok ng aspalto nito at pagkakaroon ng bitak sa construction joint.

Dahil dito, agad ipinatupad ang pansamantalang pagsasara ng tulay upang matiyak ang kaligtasan ng mga motorista.

Tiniyak naman ng DPWH na magpapatuloy ang inspeksyon at assessment sa tulay.

Magsasagawa rin ng asphalt patching sa mga naitalang apektadong bahagi nito. (DDC)