MWO-OWWA binuksan sa Kaohsiung, Taiwan
Mas magiging madali, mas komportable, at mas accessible na ang pagkuha ng mga serbisyo ng pamahalaan para sa ating mga overseas Filipino workers (OFWs) sa Southern Taiwan sa pagbubukas ng bagong MWO-OWWA Kaohsiung Office nitong Hulyo 4.
Kasabay rin nitong binuksan ang OWWA Migrant’s Brew, ang ika-41 Migrant’s Brew sa buong mundo at ikatlong itinayo sa overseas.
Higit pa sa isang café, ang Migrant’s Brew ay isang welcoming space para sa ating mga kababayan. Isang lugar kung saan maaari silang magpahinga, makapag-recharge, makipag-ugnayan sa kapwa Pilipino, at makakuha ng tamang impormasyon tungkol sa mga programa at serbisyong makatutulong sa kanilang kapakanan, kabuhayan, at kinabukasan ng kanilang pamilya.
Pinangunahan nina OWWA Administrator Patricia Yvonne M. Caunan, DMW Undersecretary for Foreign Employment and Welfare Services Felicitas Q. Bay, at MECO Chairperson and Resident Representative Corazon Aveciilla-Padiernos ang blessing, inauguration, at ribbon-cutting ng bagong MWO-OWWA Kaohsiung Office at OWWA Migrant’s Brew, kasama sina Labor Director David Des T. Dicang, OWWA Welfare Officer Zenaida S. Ramos, at mga kinatawan ng OWWA, DMW, MECO, partner agencies, at Filipino community organizations sa Taiwan.
Sa bagong tanggapan, mas mapapalapit sa ating mga OFW ang mahahalagang serbisyo tulad ng OWWA membership, welfare at case assistance, scholarships at education programs, livelihood at reintegration assistance, at iba pang social protection services na magbibigay ng suporta sa bawat yugto ng kanilang migration journey.
Ang pagbubukas ng bagong tanggapan ay patunay ng patuloy na pagtutulungan ng Department of Migrant Workers, Tahanan ng OFW, at ng OWWA sa pamamagitan ng Alagang OWWA, Serbisyong May Puso, upang matiyak na saan man naroroon ang ating mga OFW, may maaasahang proteksyon, kalinga, at mga serbisyong tutugon sa kanilang pangangailangan.
Sa OWWA, nananatili ang aming pangako: protektahan ang bawat OFW at ang kanilang pamilya, at tiyaking walang Pilipinong manggagawa ang maiiwan saan mang panig ng mundo. (Bhelle Gamboa)
