DepEd tinututukan ang lagay ng 2 estudyanteng biktima ng pananaksak sa Zamboanga

Nakatutok ang Department of Education sa kalagayan ng dalawang mag-aaral na biktima ng pananaksak ng kapwa-estudyante sa Cabaluay National High School sa Zamboanga City.

Ayon kay DepEd Secretary Sonny Angara, pangunahing prayoridad ng ahensya ang kapakanan at recovery ng dalawang estudyante.

Nakikipag-ugayan ang DepEd Central Office sa Regional Office at Schools Division Office upang masiguro na naibibigay ang tulong na kinakailangan ng mga bata at kanilang pamilya.

Siniguro din ni Angara na kasabay ng isinasagawang imbestigasyon ay ipatutupad ang karampatang child protection measures, guidance services, at psychosocial support sa mga estudyante.

Inatasan naman ng DepEd ang lahat ng schools at field offices nito na palakasin ang pagpapatupad ng school safety at polisiya sa pagbibigay proteksyon sa mga bata. (DDC)