Higit 200 pang kabataan sumailalim sa Oplan Libreng Tuli ng Las Piñas LGU
Matagumpay na isinagawa ng Pamahalaang Lungsod ng Las Piñas ang ikalawang batch ng Oplan Libreng Tuli 2026 sa Aguilar Sports Complex sa Barangay Pilar.
Umabot sa mahigit 200 pang kabataan ang matagumpay na nakatanggap ng libre at ligtas na pagtutuli bilang bahagi ng patuloy na programang pangkalusugan ng lungsod.
Sa unang batch ng operasyon ay matagumpay na natuli ang mahigit 400 kabataan.
Muling nagpaabot ng taos-pusong pasasalamat ang Lungsod ng Las Piñas sa 31 team ng mga dedikadong propesyunal na kinabibilangan ng mga doktor, nurse, midwife, sanitation officers, stock clerks, barangay health workers, pharmacists, at nurse supervisors, na naglaan ng kanilang oras, husay, at serbisyo para sa matagumpay na aktibidad na ito.
Patuloy na tinitiyak ng Pamahalaang Lungsod ng Las Piñas sa pangunguna nina Mayor April Aguilar at Vice Mayor Mel Aguilar, na naaabot ng bawat Las Piñero lalo na ang kabataan ang mga mahahalagang serbisyong pangkalusugan. (Bhelle Gamboa)
