75 pamilya sa Sibuco, Zamboanga del Norte, may bagong tahanan at kabuhayan

Umabot sa 75 na pamilya ang nabiyayaan ng bagong tahanan sa bayan ng Sibuco, lalawigan ng Zamboanga del Norte, ayon sa Department of Social Welfare and Development (DSWD).

Personal na binisita ni DSWD Secretary Rex Gatchalian ang Modified Shelter Assistance Project (MSAP) sa Barangay Jatian, bayan ng Sibuco, para tiyakin ang maayos na pamumuhay ng ating mga kababayan doon.

Ang proyektong ito, sa ilalim ng programang Payapa at Masaganang Pamayanan (PAMANA) at sa pakikipagtulungan ng Office of the Presidential Adviser on Peace, Reconciliation and Unity (OPAPRU), ay suporta sa mga nagbalik-loob, biktima ng sigalot, at mga bulnerableng pamilya para matiyak ang kanilang seguridad at bagong simula.

Bukod sa pabahay, nakatanggap din ang mga benepisyaryo ng kanilang kabuhayan sa pamamagitan ng cash-for-work (CFW) program, kung saan tumanggap sila ng P351.00 na arawang sahod sa loob ng 30 araw habang itinatayo ang kanilang komunidad.

Tugon ito sa direktiba ni Pangulong Ferdinand R. Marcos Jr. na maghatid ng tunay na pagkalinga at pangmatagalang pag-asa sa mga lugar na naapektuhan ng armadong tunggalian.

Dinaluhan ang aktibidad nina Sibuco Mayor Joel M. Ventura, DSWD Field Office 9 – Zamboanga Peninsula Regional Director Riduan P. Hadjimuddin, kinatawan ng Office of Governor Darel Dexter T. Uy at 3rd District Rep. Adrian Michael A. Amatong. Kasama ni Secretary Gatchalian sa pagbisita si DSWD Usec. Alan A. Tanjusay ng Peace and Development Group (PDG) at DSWD Assistant Secretary Irene Dumlao. (Bhelle Gamboa)