2 pekeng doktor timbog sa Isabela

Naaresto ng mga tauhan ng PNP-CIDG katuwang ang mga kinatawan mula sa Food and Drug Administration ang dalawang bebot na nagpanggap na doktor at nagpe-perform ng plastic surgery sa Cauayan City, Isabela.

Ayon sa CIDG, kinilala ang dalawang suspek na sina alyas “Maya” at “Minda” na nahuling nagsasagawa ng Botox at Gluta Treatment sa mga kliyente nito.

Naniningil ang dalawa ng 3,500 pesos per session para sa Gluta Treatment at 15,000 pesos sa pagpapa-botox.

Ayon sa CIDG ang dalawa ay walang lisensya dahil hindi pa sila pasado sa Board Exams at wala ding balidong Certificate of Registration mula sa Board of Medical Examiners.

Nakumpiska din sa clinic ang iba’t ibang gamit gaya ng mga syringe, scalp vein set, saline solution, iba pang medical paraphernalia at mga gamot.

Ang dalawang suspek ay mahaharap sa mga kasong paglabag sa Republic Act No. 2382 o The Medical Act of 1959 at Republic Act No. 9711 o Food and Drug Administration Act of 2009. (DDC)