NHCP kinondena ang paggamit sa Lupang Hinirang sa isang Rave Party sa US

Pinuna ng National Historical Commission of the Philippines ang viral video sa social media kung saan makikita ang grupo ng mga nagpa-party habang inaawit ang Lupang Hinirang.

Ayon sa NHCP, batay sa video, ang pagkakaawit sa Lupang Hinirang ay ginawa sa hindi angkop na pamamaraan habang isinasagawa ang isang outdoor rave party.

Dahil sa ibang bansa nangyari ang insidente, hindi makapagsusulong ng kaso ang NHCP laban sa mga sangkot.

Paalala ng NHCP sa mga Pinoy kabilang ang nasa abroad, ang Pambansang Awit ay protektado sa ilalim ng Republic Act No. 8491 kung saan nakasaad na dapat tugtugin o awitin ito alinsunod sa balangkas at areglo ni Juan Felipe.

Nakasaad din sa batas na bawal itong tugtugin o awitin bilang libangan o pang-aliw.

Batay sa nag-viral na video ang rave party ay nangyari umano noong Disyembre sa Estados Unidos. (DDC)