3 OFW patay, 2 pa sugatan sa baha sa Dubai

Nakatanggap ng kumpirmasyon ang Overseas Workers Welfare Administration (OWWA) mula sa Department of Migrant Workers (DMW) na tatlong overseas Filipino workers (OFWs) ang namatay habang dalawa pang Pilipino ang sugatan sa gitna ng malakas na pag-ulan at baha sa Dubai, noong April 17, 2024.

Ayon sa inisyal na impormasyon pinangalanan ang mga OFWs na sina Dante Casipong, isang sinkhole victim sa Dubai airport; Jennie Gamboa, at Marjorie Saquing, kapwa iniulat na na-suffocate sa loob ng shuttle bus.

Batay pa sa OWWA dalawa pang Pinoy ang nasugatan sa insidente ng sinkhole.

Sa direktiba ni Pangulong Ferdinand “Bongbong” Marcos Jr at OWWA Administrator Arnell Ignacio, kasalukuyan ng nakikipag-ugnayan ang mga OWWA Regional Welfare Offices sa pamilya ng mga biktima upang matiyak na maibibigay ang lahat ng kinakailangang tulong at suporta sa gitna ng malungkot na pangyayaring ito.

Ang OWWA Dubai naman ay patuloy ang komunikasyon sa gobyerno ng United Arab Emirates (UAE) upang maproseso ang repatriation sa mga labi ng ating mga nasawing kababayan sa lalong madaling panahon. (Bhelle Gamboa)