Trending food vlogger na si “Diwata” inaresto

Dinakip ng otoridad ang isang sikat na food vlogger matapos silbihan ng warrant of arrest dahil sa kasong slight physical injuries sa Pasay City.

Sa naantalang report, dakong alas-10:00 ng umaga nitong Martes nang arestuhin ng mga tauhan ng Pasay City Police Station Warrant and Subpoena Unit si alyas Diwata,42-anyos, sa Diokno Boulevard, Barangay 76 Zone 10 sa naturang lungsod.

Ang warrant ay inisyu ni Pasay City Metropolitan Trial Court Branch 48 Presiding Judge Allan B. Ariola na may petsang Oktubre 2, 2018.

Inirekomenda naman ng korte ang ₱3,000 na piyansa para sa pansamantalang paglaya ng akusado.

Nabatid na Abril 16 bandang 12:00 ng tanghali ay nagpiyansa si alyas Diwata kaya agad din siyang pinakawalan ng otoridad. (Bhelle Gamboa)