Ginebra player Jamie Malonzo humingi ng paumanhin matapos ang viral video na nagpapakitang siya ay lasing at binubugbog ng isang lalaki

Naglabas ng public apology ang player ng Barangay Ginebra na si Jamie Malonzo kasunod ng pagkalat ng video na nagpapakitang siya ay lasing at binubugbog ng isang lalaki sa isang restaurant.

Ayon kay PBA Commissioner Willie Marcial, nakausap na niya si Malonzo at kinumpirma nitong siya ang nasa video.

Humingi aniya ng paumanhin si Malonzo sa PBA, Samahang Basketbol ng Pilipinas at sa mga fans ng Ginebra at ng Gilas.

Kinumpirma din ni Marcial na nagkaroon ng gastroenteritis si Malonzo at kalaunan ay nagpositibo sa COVID-19 kaya hindi ito nakalaro sa laban ng Gilas kontra Chinese Taipei.

Isang netizen na may pangalang “Snow Badua” sa Facebook ang nag-upload ng video kung saan makikitang binubugbog si Malonzo ng isang lalaki.

Kalaunan ay binura din ang nasabing post, pero marami na ang nakapag-download at screenshot. (DDC)