P353K ‘shabu” nakumpiska; 2 suspek timbog sa Makati

Dalawang drug suspects ang nadakip ng mga tauhan ng Makati City Police at nakumpiska ang P353,600 na halaga ng umano’y shabu sa ikinasang buy-bust operation sa Molave Street, Barangay Cembo sa lungsod.

Kinilala ang mga naarestong suspek na sina alyas Jordan at alyas Ann, 33-anyos.

Ayon sa report nagsagawa ng buy-bust operation ang mga operatiba ng Station Drug Enforcement Unit (SDEU) na nagresulta ng pagkakaaresto ng dalawang suspek at narekober ang tinatayang 52 gramo ng ‘shabu’, buy-bust money, at belt bag.

Pinuri naman ni Southern Police District (SPD) District Director, Brigadier General Roderick D. Mariano ang Makati PNP sa matagumpay nilang operasyon na ikinaaresto ng dalawang suspek.

“Ang tagumpay ng operasyong ito ay isang malinaw na patunay sa dedikasyon at kahandaan ng aming mga kapulisan sa Southern Police District na labanan ang iligal na droga sa aming nasasakupan. Ang pagkakaaresto ng mga suspek at pagkumpiska ng malalaking halaga ng mga itinuturing na ilegal na droga ay nagpapakita na ang SPD ay patuloy na gumagawa ng hakbang para mapanatili ang kaligtasan at kaayusan sa aming komunidad,” sabi ni BGen Mariano. (Bhelle Gamboa)