Rider na pumasok sa EDSA Carousel Bus Lane naaksidente; nagdulot ng matinding traffic sa EDSA southbound

Isang motorcycle rider na pumasok sa EDSA Carousel Bus Lane ang naaksidente Miyerkules (Aug. 2) umaga sa EDSA Ortigas-southbound bago dumating sa flyover.

Agad itong nirespondehan ng mga traffic personnel ng MMDA.

Ayon sa MMDA, ang sangkot na rider ay naka-short pants at hindi nakasuot ng sapatos.

Sa monitoring ng CCTV camera sa MMDA, ang aksidente ay nagdulot ng matinding traffic sa kahabaan ng EDSA.

Dahil dito, muling nagbabala ang MMDA sa mga pribadong motorista at motorcycle riders na huwag dumaan sa EDSA Bus Carousel Lane.

Ayon sa MMDA, hindi ito fast lane kundi eksklusibo lamang sa mga pampasaherong bus, ambulansiya, at markadong sasakyan ng pamahalaan na rumeresponde sa mga emergencies.

Para naman sa mga nagmomotor, mainam na mag-safety gear at sumunod sa batas trapiko para iwas disgrasya. (DDC, Bhelle Gamboa)