UAE irerekomendang maisama sa mga bansang sakop ng pinaiiral na travel restrictions ng pamahalaan

Irerekomenda ng Department of Health (DOH) sa Inter Agency Task Force at sa Office of the President na isama ang UAE sa sakop ng pinaiiral na travel restrictions ng pamahalaan bilang pag-iingat sa UK variant ng COVID-19.

Sa virtual press briefing ng DOH, sinabi ni Health Sec. Francisco Duque III na pormal na hihilingin ng DOH na isama ang UAE sa travel ban para sa mga dayuhang pasahero.

Hihintayin na lamang aniya ang pasya kung aaprubahan ito ng IATF at Office of the President.

Kasunod ito ng pagpositibo sa UK variant ng COVID-19 ng isang Filipino na umuwi ng Pilipinas galing ng UAE.

Sa ngayon ayon kay Duque, pinaiiral na ang mahigpit na protocol hindi lamang sa mga pasaherong galing sa mga bansang sakop ng travel restrictions.

Ang lahat aniya ng swab test na positibo ang resuta ay agad ipinapasailalim sa genome sequencing gaya na lamang ng ginawa sa resulta ng test ng Pinoy na galing ng UAE. (D. Cargullo)