TRAFFIC ADVISORY: Oras ng pagbubukas ng zipper lane sa Commonwealth Avenue sa QC, iiksian na

Simula Lunes, ika-15 ng Marso 2021, iiksian na ang oras ng paggamit ng Zipper Lane sa Commonwealth Avenue sa Quezon City.

Ayon sa abiso ng QC LGU, magbubukas pa rin ang zipper lane ng alas 6:00 ng umaga subalit hanggang 9AM na lamang ito magagamit ng mga motorista.

Bunsod ito ng paggaan na ng daloy-trapiko sa kahabaan ng Commonwealth Avenue mula Luzon Avenue hanggang North Avenue, matapos muling buksan ang mga lane sa Quezon Memorial Circle Elliptical Road na pansamantalang isinara upang bigyang-daan ang construction ng MRT7 sa kanto ng Elliptical Road at North Avenue.

Ililipat din ang mga Traffic Enforcers at equipment sa ibang mga bahagi ng lungsod na nanatiling ma-traffic, kasama na ang Quezon Avenue mula Elliptical Road hanggang Examiner Street, na siya naman ngayong sumikip mula nang buksan ang Elliptical Road-North Avenue.