Tim Yap, KC Concepcion nagbayad ng P1,500 multa dahil sa paglabag sa City Ordinance ng Baguio

Nagbayad na ng multa sa Baguio City Local Government ang lahat ng 33 dumalo sa birthday ng celebrity na si Tim Yap sa isang hotel sa lungsod.

Sa pahayag ng Baguio City LGU, kabilang sa nagbayad si Tim Yap at aktres na si KC Concepcion ng P1,000 para sa paglabag sa Ordinance 45-2020 o Face Mask Ordinance) at P500 para sa paglabag sa Ordinance 46-2020 o Physical Distancing Ordinance.

Nagbayad din ng parehong halaga si Arlene Magalong ang asawa ni Baguio City Mayor Benjamin Magalong at 30 iba pang lumahok sa pagdiriwang.

Samantala, ang pamunuan ng Manor at Camp John Hotel ay nagbayad na din ng P9,000 multa dahil sa paglabag sa ordinansa na nagtatakda ng health and safety protocols.

Ang halaga ay para sa paglabag sa Face Mask Ordinance (P1,000); Physical Distancing Ordinance (P3,000); at New Normal Operation for Business Establishments (P5,000).

Tiniyak din ng Manor ang commitment nito sa pagsunod sa health protocols. (D. Cargullo)