Single na empleyado ng munisipyo sa General Luna, Quezon pwedeng mag-leave para makahanap ng ka-date bago mag-February 14
Malamig ba ang Valentine’s day mo dahil single ka? Sa isang bayan sa lalawigan ng Quezon, may pagkakataon pa ang mga single na LGU employees para makahanap ng “forever” at makahabol sa araw ng mga puso.
Binigyan kasi ng special leave ang mga single na empleyado ng munispyo ng bayan ng General Luna sa lalawigan ng Quezon bago ang Valentine’s Day.
Ayon kay General Luna Mayor Matt Florido, pinapayagan niyang mag-leave with pay ang mga LGU employees na single sa February 12.
Pero dahil holiday aniya ang February 12, maari nang maghain ng leave of absence ng February 11 para mas mahaba-haba ang panahon na makahanap ng ka-date sa February 14.
Payo ng alkalde, ang araw ng leave of absence ay ilaan sa paghahanap ng forever.
“Ilaan nyo ang buong araw sa paghahanap ng inyong forever upang makaabot kayo sa February 14. With pay ang leave nyo, kase naka support ako sa pinagdadaanan nyo. Ok? Lab u!” ayon kay Florido.
