Roque: Nagpapasalamat kami at nagpupugay sa lahat ng mga miyembro ng PSG na nagpaturok
Pinasalamatan at binigyang pagpupugay ng Malakanyang ang mga miyembro ng Presidential Security Group (PSG) na nagpabakuna kontra COVID-19.
Sa kabila ito na ang bakunang ginamit sa pagpapaturok ay hindi pa aprubado, hindi rehistrado at hindi legal na naipasok sa bansa.
Ayon kay Presidential Spokesperson Harry Roque, mismong si Pangulong Rodrigo Duterte ay nagbigay pugay sa ginawa ng PSG.
Isinugal kasi aniya ng PSG ang kanilang buhay para bigyan ng proteksyon ang pangulo.
“Nagbibigay-pugay po ang Presidente sa ginawa ng PSG. Sinugal po nila ang kanilang buhay para bigyan ng proteksiyon ang ating Presidente,” ayon kay Roque.
Sinabi ni Roque na malinaw at batid ng lahat na ang pangulo ay kinakailangan ng sambayanang Pilipino.
Bunsod nito, nagpasalamat din si Roque at nagpugay sa lahat ng mga miyembro ng PSG na nagpaturok.
“Maraming salamat po sa inyong katapatan, sa inyong katapangan,” ayon pa kay Roque. (D. Cargullo)
