P7.8M na halaga ng marijuana nakumpiska sa Kalinga

Nakumpiska ng mga otoridad ang P7.8 million na halaga ng marijuana bricks galing ng Kalinga at dadalhin sana sa Cagayan.

Nagtalaga ng checkpoints sa Rizal, Kalinga matapos matanggap ang impormasyon na may ibibiyaheng mga marijuana.

Ayon sa tip na natanggap ng mga otoridad, tatlong sako ng marijuana na nakatago sa concrete sewer ang ibibiyahe sa Sitio Anonang, Barangay Road, Liwan West.

Nang maisailalim sa beripkasyon, natagpuan ng mga otoridad ang tatlong inabandong sako na naglalaman ng 53 piraso ng dried marijuana leaves at stalks in bricks form at 24 na piraso ng marijuana leaves at stalks in tubular form.

Tinatayang aabot sa 65.3 kilograms ang timbang ng mga marijuana at P7,836,000 ang halaga.

Iniutos ni Philippine National Police (PNP) Chief, Police General Guillermo Lorenzo Eleazar sa lahat ng police units na magkasa ng mga checkpoint operations, lalo na sa Cordillera region para maharang ang pagbiyahe sa mga ilegal na droga. (Dona Dominguez-Cargullo)