P3.3M na halaga ng Ecstasy nakumpiska sa dalawang suspek sa PhilPost sa Taytay

Arestado ang dalawang babaeng suspek makaraang mahulihan ng mga Ecstasy sa Taytay, Rizal.

Ikinasa ang operasyon ng pinagsanib na pwersa ng anti-drug authorities ng NAIA, PDEA Region 4-A, Rizal Provincial Police at Taytay Police.

Inabangan ng mga otoridad ang mga suspek nang kuhanin ang kargamento sa Philpost Provincial post Office sa Brgy. Dolores sa Taytay.

Kinilala ang mga suspek na sina Heart Valerie Crus aka Shiela dela Buenenida, 33 anyos at Joana Kimberly Go, 26 anyos kapwa residente ng Cainta.

Nakumpiska ang 1,993 na piraso ng Ecstasy na itinago sa unan at mga tela na aabot sa P3,338,100 ang halaga.

Galing Germany ang kargamento at idineklarang naglalaman ng wedding dress, lay cover, Holland wax at iba pa.

Naka-consigne ito kay Cruz.

Mahaharap ang dalawa sa kasong paglabag sa Dangerous Drugs Act of 2002. (DDC)