Oras ng biyahe ng MRT-3 hindi apektado ng muling pag-iral ng curfew sa buong Metro Manila
Inabisuhan ng pamunuan ng MRT-3 ang mga pasahero nito na mananatili ang regular operating hours ng rail line simula Lunes, ika-15 ng Marso 2021.
Ito ay sa kabila ng pagpapatupad ng curfew hours sa buong Metro Manila simula alas 10 ng gabi hanggang alas 5 ng umaga.
Sa abiso ng MRT-3, mananatiling alas 4:37 ng umaga ang unang biyahe ng tren mula sa North Avenue at alas 5:17 ng umaga naman mula sa Taft Avenue station.
Ang huling tren naman ay aalis ng North Avenue station ng alas 9:30 ng gabi at mula sa Taft Avenue station ng alas 10:10 ng gabi.
Patuloy ang paalala sa mga pasahero na sundin ang mga health and safety protocols sa loob ng istasyon at tren upang maiwasan ang pagkalat at pagkahawa sa COVID-19.
