Operasyon ng MRT-3 saglit na naantala dahil sa indibidwal na naglakad sa riles

Ilang minutong naantala ang biyahe ng MRT-3 dahil sa isang indibidwal na naglakad sa riles ng tren.

Sa inilabas na pahayag ng pamunuan ng MRT-3, nakita ang indibidwal alas 11:35 ng umaga ng Miyerkules (Nov. 10) na nasa riles sa pagitan ng Guadalupe at Buendia (Southbound).

Agad namang nagtalaga ng Safety and Security personnel sa lugar.

Alas 11:53 ng umaga nang mahuli ng security personnel ang indbidwal at dinala ito sa platform ng Buendia station.

Alas 12:21 ng tanghali nang maibalik sa normal ang operasyon ng mga tren.

Ayon sa MRT-3 nagsasagawa na ng imbestigasyon hinggil sa insidente. (DDC)