NBI at PNP naghain ng reklamong murder laban kay Gerald Bantag kaugnay sa pagpatay kay Percy Lapid
Nagsampa ng reklamong murder ang Philippine National Police (PNP) at ang National Bureau of Investigation (NBI) laban sa suspendidong hepe ng Bureau of Corrections (BuCor) na si Gerald Bantag.
Ang reklamo ay kaugnay sa pagpaslang sa brodkaster na si Percy Lapid o Percival Mabasa sa totoong buhay.
Sa press briefing, sinabi ni Justice Sec. Jesus Crispin Remulla na inihain ang reklamo sa piskalya.
Dalawang bilang ng reklamong murder ang inihain laban kay Bantag para sa pagkamatay ni Lapid at sa pagkamatay ng umano’y nagsilbing middleman na si Jun Villamor.
Kasama din bilang respondent sa reklamo sina Senior Superintendent Ricardo Zulueta na isa ring BuCor official, at mga PDLs na sina Denver Batungbakal Mayores, Alvin Cornista Labra, Aldrin Micosa Galicia, at Alfie Peñaredonda. (DDC)
