Mayor Benjamin Magalong pagmumultahin ang asawa na nagpa-picture kasama si KC Concepcion nang walang face mask
Nakahanda si Baguio City Mayor Benjamin Magalong na papanagutin maging ang kaniyang asawa bunsod ng paglabag sa quarantine protocols sa Baguio City sa selebrasyon ng birthday ng celebrity na si Tim Yap.
Inamin ni Magalong na dumalo siya at kaniyang asawa sa birthday party ni Tim Yap dahil inimbitahan sila nito.
Sa nasabing party, may mga nakuhanan ng video na nagsasayawan nang walang suot na face mask.
Ang paliwanag dito ni Magalong, kumakain noon ng hapunan ang mga guest nang nagkaroon ng traditional dance at marami ang nakisayaw nang hindi na naibalik ang face mask.
Kumalat din sa social media ang larawan ni Magalong at kaniyang asawa kasama si KC Concepcion.
Sa nasabing larawan, si KC at ang asawa ni Magalong ay walang suot na face mask.
Aminado si Magalong na mayroong nalabag sa nasabing selebrasyon at lahat ng lumabag sa health protocols ay papanagutin.
Kasama na aniya dito ang kaniyang asawa.
“Kinausap ko na nga ‘yung wife ko e, sabi niya Daddy nakalimutan ko eh, sabi ko sa kaniya you will be fine, nakalimutan mo man o hindi, leadership by example eh,” ayon kay Magalong.
Pinadalhan na din ng letter of explanation ang pamunuan ng hotel at tinutukoy na kung sino ang mga lumabag sa health and safety standards. (D. Cargullo)
