Mas mahabang curfew hours muling paiiralin sa Caloocan
Bunsod ng pagtaas muli ng naitatalang kaso ng COVID-19 sa Metro Manila, ipinag-utos ni Caloocan City Mayor Oca Malapitan ang pagbalik nang mas maaga at mas mahabang curfew hours sa lungsod.
Base sa Executive Order 010-2021, simula Miyerkules, Marso 10, 2021, epektibo na muli curfew hours mula alas 10:00 ng gabi hanggang alas 4:00 ng madaling araw.
Ayon kay Malapitan, hindi kasali sa curfew kung emergency ang sitwasyon at ang mga papunta at pauwi ng trabaho.
Kailangan lamang ipakita ang company ID.
Pinapaalalahanan din ang mga mamamayan na hinggil sa pag-iral ng General Community Quarantine kung saan bawal pa rin lumabas anumang oras ang mga nasa edad 15 pababa.
Ang mga magulang ang mananagot kung sakaling mahuli ang mga bata na nasa labas ng tahanan.
Kaugnay nito, inatasan ni Malapitan ang Caloocan Police, Department of Public Safety and Traffic Management, at barangay officials na mahigpit na ipatupad ang kautusan.
