LRT-1 tigil-operasyon na rin simula bukas; mas maagang magsasara ngayong araw
Nagpaabiso na rin Light Rail Manila Corporation (LRMC) ng tigil-operasyon ng LRT-1 simula bukas, August 4.
Ito ay kasunod ng pag-iral muli ng Modified Enhanced Community Quarantine sa Metro Manila at ilanpang lalawigan.
Batay sa abiso ng LRMC, ang suspensyon ay tatagal hanggang sa August 18, o depende sa magiging susunod na abiso pa ng gobyerno.
Tiniyak naman ng LRMC na handa itong patuloy na magpatupad ng istriktong health at safety measures sa sandaling magbalik ang mass public transport services sa Metro Manila.
Kaugnay nito, maaga ding magsasara ngayong araw ang LRT-1.
Ito ay para mabigyang pagkakataon ang kanilang Operations personnel na makabiyahe pauwi ng kanilang mga bahay bago ganap na umiral ang MECQ.
Ang huling tren mula Baclaran ay aalis ng 9:30 ng gabi at ang huling tren mula Roosevelt ay aalis ng 9:45 ng gabi. (END)
