Lalaki pinaslang matapos malimutan ang inutang na P500 sa kapwa niya mangingisda sa Northern Samar

Dahil sa nakalimutang utang, isang mangingisda ang patay makaraang saksakin ng kapwa nito mangingisda sa bayan ng Gamay, sa Northen Samar.

Kinilala ang biktima na si Nilo Esteria, kwarenta’y singko anyos habang ang suspek ay si Henry Nofies, sisenta’y siyete anyos.

Ayon sa Northern Samar Police Provincial Office, nag-ugat ang pananaksak nang singilin ng suspek ang biktima sa umano’y limandaang pisong utang nito.

Gayunman, nanindigan ang biktima na nabayaran na niya ang utang na ikinagalit ng suspek.

Inundayan ng saksak ni Nofies sa iba’t ibang bahagi ng katawan si Esteria na agad nitong ikinamatay.

Nahaharap ang suspek sa kasong murder. (Infinite Radio Calbayog)