Kauna-unahang kaso ng COVID-19 sa Batanes naitala

Nakapagtala na ang lalawigan ng Batanes ng kauna-unahang kaso ng COVID-19.

Batay sa inilabas na pahayag ng Batanes COVID-19 Task Group, ang pasyente ay isang locally stranded individual (LSI) na dumating sa lalawigan noong September 22.

Ang resulta ng kaniyang COVID-19 test ay lumabas kahapon, September 28.

Ayon sa pahayag, walang sintomas ang pasyente pero nakasailalim ito sa striktong isolation sa Batanes Resort.

Lahat din ng natukoy na close contacts ng pasyente ay istrikto ding binabantayan ng Provincial COVID-19 Task Group.

Simula nang magkaroon ng pandemic ng COVID-19 ngayon lang nakapagtala ng kaso sa Batanes.