Kai Sotto maglalaro sa Gilas Pilipinas; uuwi sa bansa ngayong linggo ayon sa SBP

Kumpirmado nang maglalaro sa Gilas Pilipinas si Kai Sotto para sa 2021 FIBA Asia Cup Qualifiers sa susunod na buwan.

Sa Facebook Page ng “Gilas Pilipinas” sinabing uuwi ng bansa si Sotto ngayong linggo.

Ayon kay Samahang Basketball ng Pilipinas (SBP) President Al Panlilio kahit may kontrata si Sotto sa NBA G League ay maglalaro ito para sa Gilas sa nakatakdang bubble tournament.

Sa laban ng Pilipinas sa South Korea at Indonesia sa susunod na buwan na gaganapin sa Angeles University Foundation ay inaasahang makapaglalaro na si Sotto.

Sa kaniyang Instagram Account, nagpost ng video si Sotto at sinabing excited siya na nabigyan siya ng oportunidad na maging bahagi ng Gilas para sa February window.

Nagpasalamat si Sotto sa mga nagtiwala sa kaniya upang siya ay “makapaglaro para sa bayan”. (D. Cargullo)