Hotel sa Baguio City pinagpapaliwanag ng local government kaugnay sa idinaos na birthday party ni Tim Yap

Pinagpapaliwanag ni Baguio City Mayor Benjamin Magalong ang pamunuan ng isang hotel matapos mapaulat ang pagdaraos ng birthday party doon ng isang celebrity.

Binigyan lang ni Magalong ng 72 oras ang pamunuan ng hotel upang magpaliwanag kaugnay sa naganap na protocol breach.

Una nang napaulat na nagdaos ng birthday party ang celebrity na si Tim Yap sa The Manor at Camp John Hay.

Nagbahagi pa si Yap ng ulang larawan niya sa naturang hotel na ipinost sa aniyang Instagram nooong January 19.

At sa isang panayam sa telebisyon, ipinakita ang video na kuha sa nasabing party kung saan nakitang dikit-dikit ang mga bisita at nagsasayawan.

Pero paliwanag ni Yap, sinunod nila ang safety protocols at bago ang video ng pagsayaw ay nakasuot naman ng face masks ang kaniyang mga bisita. (D. Cargullo)