Face-to-face classes papayagan kung mayroong go signal ni Pangulong Duterte at IATF ayon sa DepEd
Papayagan lamang ng Department of Education (DepEd) ang pagsasagawa ng face-to-face (F2F) classes kapag ito ay pinayagan at ipinag-utos ni Pangulong Rodrigo Roa Duterte at ng Inter-Agency Task Force on Emerging Infectious Diseases (IATF-EID).
Ipinahayag ito ni DepEd Sec. Leonor Briones sa kasabay ng paglilinaw na mananatili ang polisiya ng gobyerno na walang magaganap na face-to-face classes.
Bagaman pinag-aaralan ng DepEd ang posibleng pagpapatupad ng limitadong face-to-face classes sa susunod na taon, ito rin ay ikakasa lang kapag pumayag ang pangulo.
Binigyang-diin din ni kalihim Briones na ang pagpapatupad nito ay magagawa lamang ayon na rin sa magiging rekomendasyon ng Department of Health at ng national COVID-19 task force.
Samantala, matapos ang isinagawang konsultasyon sa mga education stakeholders, nakatakda na magbigay ng ulat ang Kagawaran tungkol sa pagbubukas ng klase noong Oct. 05, 2020.
Ipinag-utos din ng kalihim ang pag-aaral sa reconceptualizing ng learning spaces post-COVID, hindi lamang ng mga silid-aralan, kundi pati ng mga tahanan, community spaces, at virtual space.
