DSWD tuloy-tuloy sa pag-abot ng tulong sa mga apektado ng Bagyong Tino sa Cebu

Habang patuloy na nararanasan ang hagupit ng Bagyong #TinoPH, hindi tumitigil ang DSWD Field Office 7 – Central Visayas sa paghahatid ng tulong sa mga binagyong pamilya sa Cebu.

Kasalukuyang inilululan ng mga kawani ng DSWD FO-7 ang 4,000 family food packs (FFPs) para maihatid sa mga bayan ng Liloan at Compostela (Nobyembre 6) mula sa Visayas Disaster Resource Center (VDRC) sa Mandaue City.

Tig-2,000 FFPs ang nakalaan sa bawat bayan para matiyak na may pagkain ang bawat pamilyang nasalanta ng bagyo.

Sa gitna ng hamon ng masamang panahon, nananatiling mabilis at maagap ang pagtugon ng DSWD bilang tugon sa direktiba ni Pangulong Ferdinand R. Marcos Jr. na matiyak ang tuloy-tuloy na pag-abot ng tulong sa mga pamilyang apektado ng kalamidad. (Bhelle Gamboa)