Dragon dance, street party, stage show at parada bawal sa pagdiriwang ng Chinese New Year sa Maynila
Ipinagbawal ni Manila Mayor Isko Moreno ang pagdaraos ng mga nakagawian nang aktibidad sa pagdiriwang ng Chinese New Year.
Sa inilabas na Executive Order No. 4 series of 2021 bawal ang dragon dance, street party, stage show, parada at iba pang kahalintulad na aktibidad para sa selebrasyon ng Chinese New Year mula February 11 hanggang 12.
Nakasaad sa EO na tiyak na makahahatak ng malaking bilang ng tao ang pagsasagawa ng Dragon dances kaya taliwas sa nakagawian na taun-taon ay bawal muna ito.
Bawal din ang pagbebenta ng alak o anumang nakalalasing na inumin sa Binondo Chinatown area para sa nasabing mga petsa.
Ayon kay Moreno, layunin nitong maiwasan ang pagkalat ng COVID-19.
Ipinagbawal din ni Moreno ang paggamit ng firecracker at pyrotechnic devices sa selebrasyon. (D. Cargullo)
