Dalawang lalaki na kalalaya lamang sa kulungan patay sa pananambang sa Maynila

Patay ang dalawang lalaki makaraang pagbabarilin sa loob ng sinasakyan nilang pampasaherong jeep sa Quiapo, Maynila.

Kinilala ang dalawang biktima na sina Reynaldo Nuque – isang dating pulis at Felizardo pablico.

Batay sa inisyal na salaysay ng mga saksi, sinabi ni Rolan Gacula, chairman ng Brgy. 310, bagong laya lamang ang dalawang biktima mula sa MPD Station 3.

Alas 10:00 ng umaga ngayong Huwebes, (Jan. 14) nang makalaya sa selda ng MPD station 3 ang dalawa na nakulong dahil sa kasong robbery holdup.

Pagkalaya sa kulungan agad silang tinambangan ng riding in tandem.

Pero ayon kay Carlo Manuel, ang tagapagsalita ng MPD, naaresto ang dalawa noong Nobyembre dahil din sa illegal possession of firearms.

Kinakausap na ng mga otoridad ang jeepney driver, na magsisilbing testigo sa krimen. (D. Cargullo)