Dalawang hinihinalang miyembro ng NPA patay sa engkwentro sa Agusan Del Sur
Patay ang dalawang hinihinalang miyembro ng New People’s Army makaraang maka-engkwentro ng mga otoridad sa Agusan del Sur.
Ayon sa impormasyon mula sa 402nd Infantry Brigade nakasagupa ng mga tauhan ng 26th Infantry Battalion ang pitong rebelde sa Sitio Damming, Barangay Zillovia sa bayan ng Talacogon.
Ang mga rebelde ay mula sa Guerilla Front 88 ng North Central Mindanao Regional Committee.
Tumagal ng limang minuto ang palitan ng putok na ikinasawi ng dalawang rebelde habang tumakas naman ang iba pa.
Nakumpiska sa pinangyarihan ng engkwentro ang isang M16 riffle, dalawang shotgun, dalawang granada, isang caliber 38, mga bala, cellphones at iba pang gamit.
