Dalawang drug personalities naaresto sa Tondo, Maynila

Arestado ang dalawang babae na kapwa na sa drugs watchlist sa isang barangay sa Tondo, Maynila.

Nagkasa ng buy-bust operation ang mga otoridad na nagresulta sa pagkakadakip ng mga suspek na sina Marilyn Manansala, 47-anyos at Mary Ann Go, 38-anyos na pawang residente ng Barangay 105 ng nasabing lugar.

Ayon kay MPD Station 1 Commander Lt. Col. Cristopher Navida, matagal nang minamanmanan ng kapulisan ang dalawang suspek dahil sa pagkakasangkot sa kalakaran ng ilegal na droga.

Dalawang linggo nang nakamonitor ang pwersa ng Raxabago Police Station sa mga nasabing suspek bago isagawa ang buy-bust operation sa harap ng Bldg 16, Aroma Compound ng Barangay 105.

Nakumpiska sa mga suspek ang humigit kumulang 26 na gramo ng hinihinalang shabu na nagkakahalaga ng P176,800 at ang P500 na buy bust money.

Kasalukuyang nakakulong ang dalawang suspek habang kinakaharap ang kasong paglabag sa Republic Act 9165 o ang Comprehensive Dangerous Drugs Act ng bansa. (END)