Bahagi ng Las Pinas, Muntinlupa, Paranaque, Imus at Bacoor makararanas ng water service interruption sa susunod na linggo

Magsasagawa ang Maynilad ng maintenance activities sa water treatment plant nito sa Muntinlupa City at sa pumping station nito sa Las Piñas City.

Layon nitong patuloy na mapabuti ang serbisyo patubig sa West Zone.

Dahil dito, ang mga customer sa ilang bahagi ng Las Piñas, Muntinlupa, Parañaque sa Metro Manila; at ilang bahagi ng Bacoor at Imus sa Cavite ay pansamantalang makakaranas ng paghina ng pressure o kawalan ng tubig sa loob ng ilang oras, sa pagitan Oktubre 13 at 15.

May mga lugar na dalawang beses mawawalan ng tubig sa pagitan ng Oktubre 13 at 15, 2020.

Pinapayuhan ang mga apektadong customer na mag-ipon ng sapat na tubig para sa itatagal ng water service interruption.

May itatalaga ding water tankers para mag-deliver ng tubig kung kinakailangan.

Payo ng Maynilad, kapag bumalik na ang supply ng tubig ay padaluyin muna nang panandalian hanggang sa luminaw ito.