Babae natagpuang patay sa kalsada sa Tuguegarao

Itinapon ang bangkay ng isang babae sa gilid ng kalsada ng Pattaui St. sa Brgy. Ugac Norte sa Lungsod ng Tuguegarao.

Ayon sa mga rumespondeng tauhan ng Scene of Crime Operatives o SOCO ng Tuguegarao City Police Station, natagpuan ni Roger Attaban – empleyado ng CENTRO Tuguegarao City ng City Government ng Tuguegarao City ang naturang babae.

Ayon kay Attaban nakita niya ang isang tila babaeng nakabalot sa sako sa gilid ng kalsada ng Pattaui St. Ugac Norte, bandang alas 5:55 ng umaga (Lunes, Oct. 26).

Ayon pa sa saksi nilapitan niya ito at napag-alamang wala nang buhay ang hindi pa nakikilalang biktima.

Agaran naman niya itong ipinaalam sa mga pulis.

Sa paunang imbestigasyon hinihinalang itinapon lamang ang biktima sa nabanggit na lugar upang iligaw ang imbestigasyon nito.

Patuloy naman ang ginagawang imbestigasyon sa kasong ito at ang motibo at pagkakakilanlan ay patuloy nilang inaalam.