Ambush kay Mayor Ronaldo Aquino kinondena ng Diocese of Calbayog
Mariing na kinondena ng Diocese of Calbayog sa pamamagitan ng kanilang Justice and Peace Desk of the Diocesan Social Action Center, ang pagpaslang kay Mayor Ronaldo Aquino, sa driver nito at isa sa mga bodyguards.
Sa pahayag, sinabi ni Bishop Isabelo Abarquez na kailanman ay hindi magiging katanggap-tanggap ang pagkitil sa buhay at pagpapahirap sa sinuman, maging isa itong pag-atake o para maghatid ng takot sa iba.
Hindi aniya kinu-kunsinti ng simbahan ang anumang uri ng panunupil, lalo na sa pamamagitan ng extra judicial killings.
Ang karapatan aniya sa buhay ay regalo para sa lahat at walang sinuman ang mayroong karapatan na kunin ito.
Kasabay ng pagpapa-abot ng pakikiramay ay nanawagan ang Diocese of Calbayog sa mga otoridad na mabigyan ng hustisya ang mga biktima at mapanagot ang mga responsable sa krimen.
