TLC at EMBO Parks sa Taguig City binuksan na

TLC at EMBO Parks sa Taguig City binuksan na

Pormal nang binuksan ng mga opisyal ng Taguig City Government sa pangunguna ni Mayor Lani Cayetano, ang mas pinagandang TLC Park na matatagpuan sa Lakeshore Road, Barangay Lower Bicutan, kasabay ng pagpapailaw sa higanteng Christmas Tree ng parke, bilang bahagi ng masaya at nalalapit na pagdiriwang ng kapaskuhan sa lungsod.

Ang TLC Park ay lalong naging kabigha-bighani ang Pasko sa Taguig sa pamamagitan ng “Sinagtala: Journey Through The Lakeshore Lights” na nagtatampok sa kagila-gilalas na makukulay na mga ilaw, kumikinang na mga instalasyon, at magagandang tanawin na libreng makikita sa parke ng mga Taguigeño, bisita, at mga banyaga partikular ang Sinagtala Entrance Arch, Biyaya Tunnel, Pag-Asa Tunnel, Storybook Trail, at marami pang iba.

Binigyang-diin ni Mayor Lani na ang Pasko sa Taguig ay pag-ibig kung saan napakahalaga aniya ang tanglaw at gabay mula sa Panginoon na patuloy na nagbibigay ng mga biyaya, pasasalamat, at pag-asa sa buhay natin anumang hamon na ating kinakaharap sa araw-araw na pamumuhay.

Hango aniya ang Sinagtala sa sinag ng liwanag at bituin na tanglaw at gabay ng mga mangingisda at biyahero sa lakeshore upang ligtas na makabalik sa kani-kanilang pamilya.

Ayon naman kay Taguig Tourism head Chi Datu- Bocobo, na bukas ang TLC Park na binansagang pinakamahabang lights park sa bansa at ipinagmamalaking tourism destination, simula Nobyembre 21, 2026 hanggang Enero 10, 2027 kung saan mula Linggo hanggang Huwebes sa ganap na alas-5:00 ng hapon hanggang 10:00 ng gabi, ar Biyernes hanggang Sabado sa ganap na alas-5:00 ng hapon hanggang 11:00 ng gabi.

Idinagdag ni Datu-Bocobo na mainit ang pagtanggap sa mga bisita mula sa labas ng Taguig at libre aniya ang parking at access sa TLC Play Park.

Pagpapalakas aniya ito sa turismo ng lungsod kung saan maraming oportunidad ang mga lokal na negosyante at alagad ng sining. Nagdagdag ng mas maraming food stalls at nagbukas ng panibagong food park sa mural park upang doon maaaring kumain ang mga bisita at tingnan ang mga obra maestra ng mga kababayan at dayuhang alagad ng sining.

Pananatilihin din aniya ang kaligtasan ng mga bisita at nakahanda ang pag-alalay ng Philippine National Police katuwang ang mga ipinakalat na safety officers at marshals sa loob at labas ng naturang parke.

Batay sa datos ng Taguig Tourism tinatayang 1.2-milyong bisita ang dumagsa noong nakaraang taon.

Samantala, nitong Biyernes, binuksan na rin ang Taguig People’s Park, sa Barangay West Rembo at pinailawan ang malaking Christmas tree nito sa pangunguna ni Mayor Lani kasama ang mga opisyal ng pamahalaang lungsod.

Kabilang sa makikita sa Taguig Carnival of Lights ang mga tindahan ng mga lokal na negosyante at food trucks upang lalong mabigyan ng saya ang mga pamilyang bumibisita sa naturang parke.

Bukas ang parke ng Linggo hanggang Huwebes ng alas-7:00 ng umaga hanggang 10:00ng gabi, at Biyernes at Sabado ng alas-7:00 ng umaga habggang 11:00 ng gabi. (Bhelle Gamboa)

 

 

 

 

 

 

 

 

 

 

 

 

 

 

 

 

newsflashph

newsflashph

Leave a Reply

Your email address will not be published. Required fields are marked *