NCRPO, pinaigting ang proteksyon sa mga bata ngayong nalalapit na kapaskuhan

NCRPO, pinaigting ang proteksyon sa mga bata ngayong nalalapit na kapaskuhan

Kasabay ng pagdiriwang ng National Children’s Month at nalalapit na Kapaskuhan, iniutos ni National Capital Region Police Office (NCRPO) Acting Regional Director Police Brigadier General Christopher Abrahano sa lahat ng yunit ng pulisya sa Metro Manila na paigtingin ang mga hakbang sa proteksiyon ng mga batang nangangaroling sa mga motorista.

Binigyang-diin ni PBGen Abrahano ang pangangailangan ng mas mahigpit na police visibility at maagap na pagkilos upang napigilan ang delikadong pangangaroling, panghihingi ng pera sa pamamagitan ng paglipat-lipat sa mga sasakyan sa matataong lansangan at mga interseksyon.

Bahagi ng tradisyong Pilipino ang pangangaroling tuwing Pasko kaya nais ng hepe ng NCRPO na hindi dapat malagay sa panganib ang mga bata sa pamamagitan ng paglapit sa mga umaandar na sasakyan, pagsingit sa daloy ng trapiko, o pagtayo sa pagitan ng mga sasakyan.

“Our children deserve to enjoy the Christmas season in a safe environment. I am directing all our police units to be proactive in protecting them, particularly those exposed to road hazards. Our duty is not only to maintain peace and order but, more importantly, to safeguard the welfare and best interests of every child,” pahayag ni PBGen. Abrahano.

Aniya dapat ding tiyakin ng mga pulis ang maayos at makataong pakikitungo sa mga bata sa pamamagitan ng pag-iwas sa pananakot, pagbabanta, pamamahiya, o hindi kinakailangang pisikal na paghawak sa kanila. Kailangang alamin ang kanilang kalagayan sa angkop at hindi mapilit na paraan, kabilang kung kusang-loob silang nangangaroling o posibleng nakararanas ng kapabayaan, pang-aabuso, pamimilit, o pagsasamantala.

Ang mga batang nangangailangan ng proteksyon o tulong ay maaari ring dalhin sa Department of Social Welfare and Development (DSWD), partikular sa mga inabandona, inabuso, pinabayaan, o biktima ng pagsasamantala.

Inatasan din ni PBGen Abrahano ang mga hepe ng pulisya na palakasin ang koordinasyon sa mga lokal na pamahalaan, mga opisyal ng barangay, mga yunit na tagapagpatupad ng batas-trapiko, at iba pang ahensya ng pamahalaan upang matukoy ang mga lugar na may mataas na panganib, magsagawa ng mga preventive patrol, at magpatupad ng mga programang nakabatay sa pakikilahok ng komunidad.

Hinimok din ang lahat ng yunit ng pulisya na paalalahanan ang mga magulang at tagapag-alaga tungkol sa kanilang responsibilidad na ilayo ang mga bata sa matataong kalsada at iba pang mapanganib na gawain sa lansangan.

“Let us make this Christmas season safe for every child. Our police officers must be firm in preventing dangerous situations but compassionate in dealing with the children involved. Their safety, dignity, and welfare must always come first,” dagdag ni PBGen Abrahano.

Sa pamamagitan ng tuloy-tuloy na police visibility, makataong pakikitungo sa mga bata, at mas pinaigting na pakikipagtulungan sa komunidad, muling pinagtitibay ng NCRPO ang pangako nitong pangalagaan ang mga bata at tiyakin ang mas ligtas na Kapaskuhan sa buong Metro Manila. (Bhelle Gamboa)

 

 

 

 

 

 

 

 

 

 

 

 

 

 

newsflashph

newsflashph

Leave a Reply

Your email address will not be published. Required fields are marked *