3 drug suspects nasakote ng SPD, ₱680K na halaga ng shabu nakumpiska
Nasakote ng Southern Police District ang tatlong drug suspects kabilang ang isang bagong High-Value Individual (HVI) at nakumpiska ang umabo’y shabu na nagkakahalaga ng ₱680,000.00 sa ikinasang buy-bust operation sa Taguig City.
Ang operasyon ay isinagawa ng mga operatiba ng District Drug Enforcement Unit (DDEU) sa koordinasyon ng Sub-Station 9 ng Taguig City Police Station, sa tabi ng estero sa Road 9, Maguindanao Avenue, Purok 3, Barangay New Lower Bicutan sa nasabing lungsod.
Nagresulta ito sa pagkaaresto ng 34-anyos na HVI na kinilalang si alyas “MAO,” at mga kasama nitong street-level drug personalities (SLIs) na sina alyas “HUDIN”, 38-anyos, at alyas “LANDO”, 31-anyos.
Nakumpiska mula sa mga suspek ang tinatayang 100 na gramo ng umano’y shabu, buy-bust money, at iba pang ebidensiya.
Pinuri ni SPD District Director PBGen Rodel A. Pastor ang DDEU operatives sa matagumpay na operasyon partikular ang pagtuko at pagkaaresto ng tatlong drug personalities na sasampahan ng kasong paglabag sa Comprehensive Dangerous Drugs Act of 2002.
“The arrest of a newly identified HVI demonstrates our commitment to pursuing key players in the illegal drug trade. We will continue to strengthen intelligence-driven operations to prevent illegal drugs from reaching our communities,” sabi ni PBGen Pastor. (Bhelle Gamboa)
