Imbestigasyon sa holdapan sa Caloocan City, pinapalawak ng NCRPO
Pinapalawak ng National Capital Region Police Office (NCRPO) ang imbestigasyon sa nangyaring robbery-hold-up sa Caloocan City kung saan posible umanong may ugnayan sa iba pang krimen at pagkakasangkot ng iba pang pulis.
Kaugnay nio iniutos ni NCRPO Acting Regional Director Police Brigadier General Christopher Abrahano ang pagpapalawak ng imbestigasyon kaugnay ng robbery-holdup na naganap noong Nobyembre 16 sa Caloocan City na kinasasangkutan ng anim na tauhan ng pulisya.
Layunin nitong matukoy kung may kinalaman din ang mga suspek sa iba pang kahalintulad na insidente at kung mayroon pang ibang tauhan ng NCRPO na posibleng nakipagsabwatan, tumulong, o nagbigay ng proteksiyon sa grupo.
Binigyang-diin ni PBGen. Abrahano na kailangang matukoy ng mga imbestigador ang lawak ng mga ilegal na aktibidad ng grupo, kabilang ang posibleng pagkakasangkot nito sa iba pang insidente ng robbery o mga operasyong kriminal.
Bahagi rin ng pinalawak na imbestigasyon ang pagtukoy kung may iba pang tauhan ng NCRPO na sangkot, may koneksiyon, o nagbibigay ng tulong sa grupo.
Iginiit ni PBGen. Abrahano na hindi lamang sa mga pulis na natukoy magtatapos ang imbestigasyon.
“Hindi natin titigilan ang imbestigasyon sa iisang insidente lamang. We need to determine whether these individuals have committed similar crimes before and whether there are other people working with them. I want our investigators to establish whether there are other police personnel within the NCRPO who may be involved, assisting, or protecting this group. If there are, we will find them and hold them accountable,” ayon sa heneral
“Hindi natin papayagan na gamitin ang ating organisasyon bilang proteksiyon o instrumento sa paggawa ng krimen. Walang puwang sa NCRPO ang mga pulis na nakikipagsabwatan sa mga kriminal. We will not protect anyone, regardless of rank, position, or assignment,” dagdag ng hepe ng NCRPO.
Batay sa paunang imbestigasyon, naganap ang insidente noong gabi ng Nobyembre 16 nang magkasundo ang dalawang biktima—isang pulis na nakatalaga sa PNP Drug Enforcement Group at isang negosyante—na makipagkita sa mga suspek para sa umano’y transaksiyon sa alahas na nagkakahalaga ng ₱700,000 sa isang convenience store sa Barangay 87, East Grace Park, Caloocan City.
Pagdating sa napagkasunduang lugar, tatlong suspek umano ang lumapit sa mga biktima, tinutukan sila ng baril at inutusang dumapa.
Tinangay ng mga suspek ang mga gamit ng mga biktima, kabilang ang isang motorsiklo, tatlong cellphone at baril. Sapilitan din silang isinakay sa isang sasakyan at dinala sa Diliman, Quezon City, kung saan sila iniwan.
Samantala, isang police major na nakatalaga sa Criminal Investigation and Detection Group (CIDG) ang kalauna’y naaresto sa isang follow-up operation kaugnay ng insidente.
Muling tiniyak ni PBGen. Abrahano ang paninindigan ng NCRPO sa patas at walang kinikilingang imbestigasyon gayundin ang mahigpit na disiplina sa hanay ng pulisya.
Aniya, walang sinuman ang bibigyan ng proteksiyon o palalampasin sa imbestigasyon at kaukulang aksiyon, anuman ang ranggo o posisyon nito. (Bhelle Gamboa)
